هتشتري موبايل جديد ؟!
يبقي لازم تقرا البوست دا .
يلا بينا .
متقارنش بين شركة وشركة من نوع موبايل مختلف ف الفئه . يعني متمسكش سامسونج ستار وتروح تيجي بعدها تمسك مثلا هواوي gr5 وتقول سامسونج وحشه وبتهنج وزباله و و و .
يعني بص يا سيدي . بالبلدي كدا انت هتنزل تشتري موبايل جديد .
وناس كتير بتقولك سوني حلو . لا هواوي احلي . لا دا لينوفو صيني .
مبدئيا عشان نبقي متفقين كلو صيني . مع فرق الكواليتي الي اتعمل بيها المنتج .
دلوقت انا بكلمك كواحد عاوز يشتري موبايل جديد .
انا عن نفسي بحب اجرب . بس دلوقت انا مثلا معايا ف حدود 1500 جنيه وعاوز اجيب موبايل كويس .
هنلخص الليله ف 4 خطوات :
1-الموجود ف السوق من كل الشركات في رينج فلوسي .
2-المقارنه بينهم والفلتره .
3-مرحلة القصاص.
4-قلبها في دماغك وانزل اشتري الموبايل 
*طيب عندنا ايه في السوق شركات : سامسونج - هواوي - سوني - لينوفو - انفنيكس - htc - lg - تكنو -oppo- وحديثا شاومي .
نمسك كل شركة ونشوف كل موبايل ممكن يتماشي مع فئه الفلوس الي معايا .
واروح جايبهم كلهم كدا قدامي .
*واروح ماسك كوباية شاي محترمه وابدأ اقارن بين امكانيات الاجهزه والتصميم والكلام دا كله من علي Gsmarena.com واروح مصفي المقارنه مثلا علي اكتر 2 او 3 عجبوني. وطبعا اعلاهم امكانيات واعلاهم توافق لاحتياجاتي . مثلا بطاريه قويه - كاميرا نضيفه - زي منت محتاج . انت الي هتمسك الموبايل مش امي . يعني اكيد هات الحاجه الي انت محتاجها وهتستفاد منها مش فشخره وخلاص هيا .
*وتروح جاي علي المرحلة التالته وهيا مرحلة القصاص .
تعريف الريفيو ( هو ان حد ماسك الجهاز وبيستخدمه وبيشرحلك كل الي فيه من عيوب ومميزات )
طبعا مشاء الله نص الشباب بقيوا ريفوررز كلهم اليومين دول وبيعملو ريفيوهات بس ابعد عن المطبلاتيه .
تبدأ تشوف ريفيوهات اجنبي الاول للاجهزه الي فلترتها وادائها واستخدامها وبعد كدا تشوف ريفيوهات عربي
وبعد كدا تبقي تصفي بقي لغاية متستقر علي جهاز واحد بس وهنا بنقول مرحلة القصاص انك هتقتص من كل الشركات وترسي علي حبك الاول والاخير الي علي قد جيبك .
*طالما قررت يبقي تلخص بقي تبطل شغل المحن وتروح تسأل مش عارف مين وواحد ياخدني بكلمه والتاني يجبني بالتانيه لغايه ميكرهوني ف ام الجهاز ويشتتوا افكاري وممكن يكونو جهله اصلا وميعرفوش الجهاز نهائي بس الي هو بيحبطك وخلاص .
*لو هتاخد رأي حد خد رأي حد يكون خبره وفاهم واسأله ولما يقولك وحش مثلا ناقشه وقوله ليه وطب ايه احسن ومتطلعش من المحادثه غير لما تجيب اخره يا اما تجيب الجهاز بتاعك الي انت حددته . او هو هيرشدك لحاجه جديده ومش هتلاقي مثلا لانك هتكون مربوط بسعر معين وبالتالي انت جبت كل الماركات ف بالتالي كل دا خلاص بح مالوش لازمه 
يعني ممكن يلفت نظرك لحاجه بسيطه ف الاول او الاخر . بس اهم حاجه انت تكون مقتنع من جواك .
*وتنزل تشتري الجهاز  علي بركة الله .
انا عن نفسي مبحبش اشتري اجهزه ضمان محلي . لان الضامن ربنا واوسخ توكيلات ف مصر . ف دولي بالنسبالي افضل عشان هيبقي اقل ف السعر بفرق حلو . بس تجيبه من مكان مضمون لو هتجيب دولي .
عاوز تجيب محلي انت حر برضو براحتك .
نسيت اقولك نقطة المنافسه دي حلوه اوي بين الشركات ان كل شركه بتنزل جهاز بنفس السعر . او مقارب جدا . هما يتنافسوا وانت خد بذره التنافس دا بانك تاخد الافضل .
ومبروك عليك موبايلك الجديد .
كفايه بقي سب ولعن لسلسافين الشركات الي مالهاش ذنب .
وكفايه تعليق اخطاء علي شماعات الاخرين .
علي قد فلوسك انت بتمسك ومتقارنش ف حياتك جهازين مش متوافقين ف الفئه السعريه يعني متقارنليش جهاز ب 1000 من هواوي قصاد جهاز ب 2000 من سامسونج اكيد لازم الهواوي يبقي زباله . لا قارن بعقل وتساوي بينهم واختار الكويس ليك .
مشوفش واحد داخل يقولي معايا كذا طب اجيب ايه 
اللهم بلغت 
انا اديتك خلاصة وزتونة الحوار كله .
خليك انت سيد قرارك وانت الي تتفرج وتختار وتحدد .